ابني لوحة أحلامك النهاردة
ابني لوحة احلامك النهاردة
في نظرية معروفة بتقول لو اطلقنا طاقة ايجابية للكون هنجذب طاقة ايجابية لينا… نظرية بسيطة اسمها نظرية الانجذاب واللي دعمتها وسوقت لها اوبرا ونفري بعد ما قرأت الكتاب المشهور The Secret
بنفس المنطق، في نظرية بتقول لو جسدتي وشوفتي طموحاتك واحلامك كل يوم قدام عينيكي، الاحلام دي هتتحقق. لو مش بسبب قانون الانجذاب يبقي بسبب ان عمر ما هيحصلك تشتيت عن طريقك. انتي عارفه الهدف وشايفاه وهتوصليله.
ومن هنا جت فكرة ال vision board او لوحة الاحلام…
لوحة الاحلام هي كولاج او مجموعة من الصور والرسومات والمقولات اللي بتعبر عن طموحات شخصية، ومصممة عشان تكون مصدر للالهام و التحفيز. بمعني اخر لما كل يوم تشوفي اللي انتي عايزاه قدام عينيكي هتحققيه.
احلي حاجة في لوحة الاحلام ان مفيش واحدة زي التانية وبتكون فعلا انعكاس لتفردك وشخصيتك وتفكيرك. ممكن تعتبريه مشروع صغير لذيذ قوي وفي نفس الوقت له قيمة كبيرة وهتشوفي تأثيره علي حياتك.
اولا: حضري الادوات اللي هتحتاجيها
اللوحة: ممكن تكون فرخ كرتون او لوحة من الفلين او خشب، المهم تبقي خامة عملية لوضع صور عليها
مصدر للصور: مجلات او كتالوجات او هتطبعي صور من الانترنت
مقص
دبابيس او شريط لزق او صمغ
ثانيا: مرحلة البحث و التفكير
أول خطوة في مشوار النجاح هي تحديد الهدف. الهدف مش لازم يبقي دايما متعلق بالمادة او المركزالاجتماعي، بس
تعالوا نوسع الدايرة شوية وناخد وقت نجاوب فيها عالاسئلة دي
أنا نفسي في ايه النهاردة
عايزة ابقي ايه كمان سنتين او خمسة او عشرة
عايزه احساسي يبقي ايه
عايزة صحتي وشكلي يبقوا ايه
عايزة حياتي تبقي ازاي وايه اولوياتي
من الافكار المعروفة للوحة الاحلام انك بتحطي صورة بيت الاحلام وصورة عربية الاحلام باللون اللي نفسك فيه -ايوه البورش الحمرا- بس ممكن كمان نحط صور بتعبر عن الاحساس اللي بندور عليه، العلاقة اللي نفسنا فيها، شكل الحياة الاجتماعية والاسرية، نمط الحياة اللي بنحلم بيه سواء رياضي او مغامرة او سفر…
ترجمي كل اللي نفسك فيه لصور، حتي لو طول عمرك نفسك شعرك يكون طويل حطي صورة شعر طويل.
ثالثا: مرحلة تنسيق الصور والمقولات المقتبسة علي اللوحة
هنا بقي مفيش قواعد…حطي اللي تحبيه بالشكل اللي تحبيه باللون المفضل بالطريقة اللي انت عارفه انها هتجذبك وتحفزك. ممكن تضيفي تاريخ السنة علي اللوحة وممكن بعد كل فترة زمنية تشيلي وتحطي حاجات علي حسب تغير اولوياتك.
ماتنسيش تحطي كلمات ايجابية ومحفزة وممكن كمان تحطي حاجات تذكار عندك مهمة و بديكي طاقة ايجابية زي ميدالية او تذكرة حفلة.
واخيرا في دراسة عملتها مجلة فوربز عام ٢٠١٦ علي ١١٠٠ شخص و٥٠٠ مشروع صغير عشان تسأل عن تأثير تجسيد الاهداف. النتيجة كانت ان ١٠٠ من المشاريع الصغيرة استعملوا لوحة احلام و ٧٦٪ قالوا ان مشروعهم وصل للاهداف اللي حطوها في لوحة الاحلام. الناس اللي بتتخيل بالصور الاطار الكبير لطموحاتها وحياتها بيبقي عندهم ثقة اكبر انهم يحققوها وفرصة تحقيقها بالفعل أكبر.
لا تستهيني بتأثير لوحة الاحلام وخدي الموضوع بجدية… الاحلام هتبقي واقع.
ابعتيلنا صورة للوحة احلامك مع
#sunsilkdreamstoreality