Skip to content

فتاة ذات شعر مجعد تستمتع بالمثلجات

خمس قواعد تجميل قديمة لازم تغيريها

خمس قواعد تجميل قديمة لازم تغيريها النهاردة

 

احنا دايما بندور علي احدث النصايح للموضة والجمال.  في عندنا شوية بديهيات اتعلمناها من واحنا صغيرين و بنكمل عليها.

الاحمر مابيليقش عالوردي وماينفعش نلبس الاسود مع الكحلي وماتنميش وشعرك مبلول عشان هيقع.

مين اللي حط القواعد دي وليه احنا متمسكين بيها؟ ليه مش بنشكك فيها ونثور عليها؟

 المفاجأة النهاردة ان احنا حنتكلم عن شوية من القواعد الاساسية دي…. وحنكسرها 

الشنطة لازم تبقي نفس لون الجزمة

ملل… القاعدة دي بتعكس حاجة واحدة بس وهي الملل.  مفيش احلي ولا الذ من انك تلعبي في اختياراتك للجزم و الشنط.  شنطة حمرا مع سنيكرز بيضا… شنطة خضرا مع بلارينا نيود… شنطة سودا و جزمة حمرا.  الاختلاف ده بيلفت الانظار ليكي وبيضيف لمسة عصرية لمظهرك وبيعكس تفرد شخصيتك.

الشعر لازم يتسرح كل يوم ومفيش هيشان

شكل الشعر المتسرح والمترتب جميل، بس في اختيارات تانية زي الbed head و الbeach waves.  الفكرة كلها ان يبقي شعرك شكلة حلو بس طبيعي مش معمول في صالون متخصص.  احسن طريقة عشان توصلي للشكل ده انك تغسلي شعرك وتحطي leave-in conditioner وتلميه وتنامي بيه مبلول.  فكي شعرك الصبح و من غير تسريح، فكي و افصلي الخصلات بصوابعك وهتلاقي فيه تموجات طبيعيه  لذيذة.  لو شعرك مش مضبوط من قدام، تقدري تلمي النص الامامي من غير ما يكون مشدود وتسيبيه من ورا.

الظوافر شاكلها كاري مدور

بقالنا سنين وسنين بيقولولنا الظوافر كاري مدور، ليه؟ ومين قال؟ علي فكرة تشكيل الظوافر المفروض تكون علي حسب شكل الظافر الطبيعي.  يعني الظوافر العريضة مش مناسب ليها الشكل المربع، بالعكس الشكل البيضاوي هيسحبها و يخلي في انوثة اكتر في شكل الظوافر.  يللا، غيري شكل ظوافرك النهاردة وجربي شكل و لون جديد.

الروج الغامق بيكبر

عارفه ايه اللي حقيقي بيكبر؟  ان شفايفك تبقي جافة ومش مترطبة كويس.  اعملي scrub لشفايفك و جربي الروج الغامق اللي نفسك فيه سواء بني او نبيتي. اتاكدي ان الروج مش خارج بره تحديد الشفايف و اخر خطوة انك تحطي ملمع شفايف يخلي شكل الشفايف مرطبة و صحية.

الكونسيلر بيبقي درجة افتح من لون بشرتك

 من اكبر المفاهيم الخاطئة في عالم المكياج ان تحت عينيكي يبقي ابيض وفاتح.  كونسيلر تحت العيون لازم يكون بنفس لون بشرتك و في انسيابية مع لون كريم الاساس لانه لو استعملتي درجة افتح بيقلب لون رمادي باهت.  الصح ان لون الوجه يبقي موحد و بعدين بتلعبي بالhighlighter عشان توصلي للنتيجة المشرقة اللي بتدوري عليها.

في مفاهيم تانية كتير زي ان لو شعرك احمر ماتحطيش روج احمر، وماينفعش لون ظل الجفون يبقي نفس لون الروج، و لازم نغطي النمش ولازم ولازم ولازم…. والحقيقة ان مفيش حاجة لازم.  الصح ان احنا مانمشيش ورا النصايح القديمة ولا الجديدة من غير ما نجرب و نشوف ايه اللي ماشي معانا ومريحنا… ايه اللي بيعكس شخصيتنا وحياتنا…  

انتي اللي حتحطي نصايح التجميل الخاصة بيكي انتي وبس.

ابحثي كذلك عن

( 5 )

انضمي إلى المحادثة