Skip to content

فتاة ذات شعر مجعد تستمتع بالمثلجات

دليلك للحصول على نيو لوك مختلف

خطوات سهلة وبسيطة لنيو لوك ممتع

 

كلنا بتعدي علينا اوقات بنحس فيها بملل من كل حاجة حوالينا حتي نفسنا.  ده هو الوقت المناسب انك تفكري تغييري في شكلك او تعملي new look.

نيولوك مش معناه ستايلست وpersonal shopper وميعاد كمان شهر عشان اعمل شعري بالفات الجنيهات.  مش لازم نعمل حاجة بفلوس كتير او نعمل تغيير جذري عشان تحسي بالتغيير. بالعكس، في حاجات صغيرة اوعدك هتخلي كل الناس تلاحظ وتعلق علي الشكل الجديد.

قبل ما تقرري هتعملي ايه بالضبط لازم تفكري في المرحلة اللي انت فيها في حياتك.  هل انت في شغل جديد مثلا؟ هل الشغل ده عايز مظهر معين.  هل انت في مكان بيشجع الابداع والافكار الجديدة ولا متحفظ اكتر.  هل انتي بتروحي الجامعة كل يوم ومحتاجة ستايل يكون عملي للحركة الكتير؟  هل انت في اجازة و مفيش اي تقييد وده وقتك عشان تجربي حاجة جديدة؟

الاجابات دي هي اللي تحدد نوع التغييرات اللي ممكن تعمليها و تبقي عملية بالنسبالك وتبسطك.
فكرة التغيير هي اننا نطلع بره المعتاد واللي متعودين نعمله في كل حاجة.

اولا: شعرك


في حاجات كتير ممكن نعملها تغير من شكلنا من غير ما نحتاج نقص شعرنا جامد لان ده ممكن يكون التزام انت مش حابه تعمليه حاليا. البدائل لتغيير ستايل شعرك من غير ما تقصيه:

  • تغيير فرق الشعر: ده تغيير مش بيحتاج اكتر من مشط ولكنه بيغير في الشعر كتير. لو انتي بتعملي فرق علي الجنب، جربي فرق في النص والعكس صحيح.  كمان تغيير مكان الفرق من اليمين للشمال بيفرق كتير لان الجنب الجديد في الغالب بيبقي اتقل و اعلي وبيدي تقل للشعر.
  • قصري القصة: تغيير بسيط بس بيفرق كتير في الشكل وبيدي اطلالة مختلفة.  وممكن تعمليها لنفسك في البيت بس اهم حاجة تقصي دايما اطول مما انت عايزة عشان تتاكدي انها مش قصيرة بزيادة.

غيري طريقة تسريحة شعرك: لو عادة بتعملي شعرك كيرلي، جربي تعمليه مفرود و العكس.  اختاري عكس اللي انت بتعمليه وشوفي فرق التغييير.

-واخيرا ممكن تجربي تفتحي او تغمقي شعرك درجة او اتنين باستعمال صبغة البيت.  في انواع دلوقتي كتيرة خفيفة وخالية من الامونيا وسهلة وتقدري تحطيها لمدة نص ساعة بس عشان تغييري من لون شعرك.

ثانيا: الوجه والمكياج

  • ابتدي بعمل scrub خفيف علي الوجه لان بيديكي باحساس انتعاش وبيتخلص من الجلد الميت اللي بيخلي الوجه باهت.

  • ترطيب البشرة مهم جدا لانه مش بيبين اجهاد البشرة.

اهم حاجة في الوجة هي الحواجب.  اتاكدي ان رسمة حواجبك مناسبة لنسب الوجة.  املي الحواجب بطريقة طبيعية باستعمال eye shadow لونه قريب من لون شعرك ومش اغمق. 
 


مرة تانيه بانصحك تجربي حاجة جديدة في مكياجك عشان تحسي بالتغيير.  اختاري حاجة واحدة بس اعمليها سواء تجربي روج احمر لاول مرة او تعملي winged eyeliner.  لو مش بتعرفي تعملي مكياج كويس ممكن تتفرجي علي فيديوهات علي الانترنت او تطلبي مساعدة من صاحبتك الاروبة في المكياج

 


ثالثا: اللبس

 

 

  • قبل ما نفكر هنغير في لبسنا ازاي، فكري مين الممثلة او المغنية او اي شخصية معروفة انت عالطول بيلفتك
    لبسها وشكلها و دوري علي صور ليها وابتدي شوفي الاطقم اللي انت عجباكي وحاسه انها ممكن تمشي معاكي و في حياتك اليومية.
  • للمرة التالتة باقولك تجرأي و جربي حاجة مختلفة.

لو بتحبي تلبس الوان كتير ومشجر، فاجئي نفسك و اصحابك بباليتة الوان هادية او جينز وقميص ابيض.
لو معروفة انك ملكة الاسود، البسي فستان احمر او قميص اخضر. 
لو بتلبسي جينز بس، جربي تلبسي جوب ملونه مع تيشيرت ابيض وسنيكرز او فستان مع جاكيت جينز.
ضبطي ٣ اطقم مختلفة عن ستايلك عشان تجربيهم. 
التغيير مطلوب ولذيذ ومش معناه انك تلبسي حاجة مش مريحة او مش عملية لنمط حياتك.
التجديد عملية ممتعة بتخليكي وبتخلي الناس اللي حواليكي يعيدوا اكتشاف نفسك.
ماتخافيش تجربي حاجة جديدة، ماتخافيش من التجديد
 

ابحثي كذلك عن

( 5 )

انضمي إلى المحادثة